2025客家興起6月份代禱信

客福簡訊月刊 2025.5
客家興起總召 / 劉志忠

瀏覽次數: 6

𠊎所認識个客家興起

腓立比書 4章6-7節「應當全無掛慮；凡事愛祈禱，將你等所需要个㧯上帝講，用感謝个心來祈求。上帝所賜、該超過人所想像个平安，會通過基督耶穌保守你等个心懷意念。」跪禱以後心想：「敢去就一擔柴，毋敢去就屋下愁」。講起來簡單做起來嗄困難。在桃園楊梅个富岡故事館，今年已經連續第二年辦毋插電音樂活動，在第一年無同任何公部門申請補助之下，故事館店長小羊先生(廖玟皙)姊妹同(郭子瑋)咖啡師弟兄一手包辦所有事工。在資源有限个情況之下，小羊先生識提過邀請客家興起个建議，筆者也就放到心肝肚毋敢多想。後尾在該姊妹仔个提醒，講客家興起樂團愛提早注文，無到時節聖誕節又會像舊年共樣，心肝緊想遽遽傳分 Line 熟識个朋友，斯恁仰正牽起這條線。

客家教會愛仰仔撐起後生人世代？這係當多牧者同長老執事關心个課題。臺北靈糧堂執事、客家福音協會董事，還有客家興起音樂事工團隊總召劉志忠律師，一路裡來為著這打拼。佢想著十過年前个一場客福同客神聯合舉辦个顧問餐會，當時佢淨四十零歲个佢識打白講：「客家教會無後生人，就無未來吔！」劉律師指出，頭擺異多客家後生人因為各種原因毋講客，甚至毋認同客家身分。佢道嘆个問道：「係講未來个後生人都毋講客，該𫣆還做得安做客家教會無？還有需要客家宣教無？」因為恁呢，佢提出一個關鍵个建議：「客家教會需要有後生世代个詩歌！」這隻聲音成為了成立客家興起音樂事工个起點。對敬拜詩歌切入吸引後生仔佢等，對後生仔中意个詩歌旋律切入，毋單淨藉這機會來講客，還愛體現對客家身分个認同。劉志忠表示，該央時會議大約一半个時間都在討論詩歌，雖然厥个提議大家當場反應當好，毋過神个時間還吂到。2017 年 9 月在沙巴亞庇舉行个第五屆全球客家福音大會項，佢兜受邀請創作大會个會歌，因為兩隻月以前正提出，做个時間當趕，佢兜還係煞猛打拼完成，上飛機前正拿著單曲 CD，無想著該央時創作个詩歌〈客家從山肚到四海〉會風神到外國。佢表示，這下海內外盡多客家教會个後生人流失，佢嗄看著一息教會後生人敬拜團創作个詩歌，做得餳後生人。佢講，後生人毋好傳統教條，因為恁呢，佢乜希望客家教會乜有後生人曲風个創作詩歌，來貼近後生人个心，落去餳佢兜，甚至唱等唱等，「摎客話拈轉來！」世大人往擺教後生人愛仰仔做，毋過佢這兜無定著會聽，但係後生仔自家認同之後，佢兜就會自家去做。這幾年來，佢聽到客庄个教會，因著開始唱客家興起个詩歌，後生人慢慢轉到教會、入到教會，佢心肝肚非常歡喜，也非常感謝上主。

對第一張專輯，佢邀請客家金曲歌手邱廉欽擔任音樂製作人，邱弟兄認為佢係團隊總召，應該愛創作一條歌仔，故所佢寫下來〈客家興起〉个歌詞。這張專輯也係在 2018 年 10 月客家福音協會四十週年个時節，獻分上帝个等路。該央時討論專輯名仔个時節，核心牧長同工決定用「客家興起」名稱。

舊年小羊姊妹邀請客家興起團隊無成功，自家也試著因為經費个限制像䌈著腳樣無辦法行前，毋過盡尾想著無論仰仔應該愛行出第一步，結果交分神決定就好。神在 2021 年个臺中客家文化研討會(既古國順教授論壇)既經分𠊎同阿 Kim第一擺合作，結下當美好个果子，這下想就像聖經書項講个：「神為愛佢个人所預備个，係目珠無看過呢，耳公無聽過，人心乜無想過个。」哥林多前書 2章9節